மாமியார் வீட்டு வாசத்திற்குப் பின்.

என் வீதிக் கூரையும் மாடியும்
வியந்து நோக்கின
அந்நியப்பட்டு விட்டேனாம்

என்னுடன் போட்டியிட்டு வளர்ந்த
மாவும் பலாவும்
பூக்கும் காய்க்கும்
தொழில் திரிந்தன
என் வரவு நிகழாததால்.

என் வீட்டு மழை தாங்கி
`கூரைக்காரனோ’,
ஓயாமல் எனைத் தட்டிச் செல்லும்
வாலு எங்கே ?

அவன் தட்ட நான் உதிர்ந்தாலும்
தட்டாமல் செல்லும்
சில நிமிடங்கள்
என்னுடன் ஊடலா
என்றெனை வாட்டின.

இங்ஙனம்ஒவ்வொன்றும் உருக
நான் மட்டும் ஏனோ அந்நியப்பட்டேன்.
மாமியார் வீட்டை கட்டிக்கொண்டு.